今日開始講解長倉思路中，第一個部份「大市方向」，老實講喺第一次推出課程的時候大約三年幾前，由於正值牛市，面對都只係”周期性熊市”因此只講解咗市寬的運用，但過去一年大家都知道港股已經進入熊市，最近更加報道指出已經再進入返牛一，而美股就正在”長期熊市”當中，究竟我哋可以點樣去判斷牛熊市呢？

透過閱讀唔同牛熊市研究，不二覺得最簡潔同最實用就係道氏理論提出牛熊市周期，認為股市同市場經濟表現掛鉤，而且升升跌跌都係有一個周期，而每個周期都有三個階段形成，簡單講就係牛一，牛二，牛三以及熊一，熊二，熊三。

一般情況下牛市開始就係指距離上一個熊市低點會升咗20%以上，基本上就可以確定為牛市，相反熊市就係佢由前高點下跌20%，而通常都會用SP 500判斷市場係咪處於熊市，而最近美股正正係高位下跌左20%，理論上正式踏入熊市

但大家都知道假如大市下跌左20%你先確定熊市作用大唔大？同埋一個咁公開指標到底對於操作有冇用？依點都非常之值得思考，但無論點樣都要清楚了解基礎理論才有下一步部署。

以下表格就係說明左牛熊三個時期的特徵，令你更方便分析市場處於邊一個階段（請細心閱讀以下表格以及想像現在港股及美股處於邊一個階段，只有運用先會對你有幫助。）

如果過去有留意不二的朋友都知道我個人睇法，港股剛完成熊市二期階段，相反美股先啱啱開始踏入熊市二期，未來7，8，9月都會有多間公司公布業績，假如財報數據唔好，會導致大家用嚟評估股票價值平定貴的PE中的E（earning）下跌，咁就算過去半年美股下跌左幾多都好，都唔可以形容為便宜的階段。

另外有一點要注意就係好多時熊市末段會同牛市第一段混合在一齊比較難分辨，就好似現在港股情況。港股中的科技股由於過去比外國基金拋售或者受到阿爺政策影響好可能已經見咗短期底部，現時處於橫行階段，到底港股係進入熊市三期定牛一相信好快會分出勝負，特別係科技股佔恆指比重咁多，假如科技股進行突破將會真真正正帶動恆指進入牛一。

最後有好多人忽略一點就係處於牛市階段通常都係”慢升快跌”，相反處於熊市時候好多時候都”慢跌快升”，大家可以理解為市場不停運用人性特質去運行，熊市時候最可怕就係不停撈底，但到底點樣可以吸引你去撈底呢？就係下跌之後突然急升令到你害怕會錯過明天升幅甚至熊轉牛的機會。。

唔知係好彩定唔好幸運，當年不二進入市場時候正值港股熊市，因此親眼目睹過身邊好多人不停撈底之後股價不停跌的情況，令到我對於熊市威力有非常深刻印象，而現在美股正正處於”長期熊市”當中，所以我交易都偏向期權買賣，而絕少持有正股，但事實上只要你嚴格執行止蝕，唔好由短炒變長揸，其實熊市又有乜好怕呢？