環球市場從低息放水到現在高息收水的環境，已經從根本上產生變化，好多人仲用緊過去十幾年嗰一套去投資，短炒冇問題，做好風險回報比去下注轉身快，好多有經驗朋友都可以在短線搵錢，但作為一個相對長線的投資組合考慮的就唔係短短幾個星期或者一個月，而更應該考慮市場週期上的掌握，因為其對於投資的長期回報率產生關鍵影響。如果不幸地在市場週期的頂部入市，可能會帶來災難性的後果！

相比市場憧憬減息重回低息環境，我更相信市場已經從過去利率持續下降的環境轉換成利率持續上升的周期，下圖是1966年至1983年利息持續上升期時通脹情況同現在環境的比較，好多人認為通脹短期回落事情就馬上解決。

但事實是同樣是一段醞釀期之後通脹急升, 當年通脹都一度受控回落, 但及後通脹捲土重來突破高位, 現時通脹情況看似受控，導致市場再次認為美聯儲即將減息，假如美聯儲真係如市場所料停止加息，怎至減息，通脹相信一樣將會捲土重來，重走當年的舊路。

而最大的問題係過去40年，大部份投資者都處於一個利息下降的周期，金融資產價格都屬於在風口的位置，令到好多人有錯覺「投資好容易」，連巴菲特都講利率就好似股票價格的地心吸力，利率越高跌得越厲害，利率越低甚至低到一定程度就可以飛，而大家在疫情期間的非常低利率加上大量印錢的情況下應該都體驗過資產價格的瘋狂，短時間內Tesla大升20倍成為股王。

所以大家過慣過去幾十年的好日子，假如未來會長期保持一個利率上升的周期或者高息的環境，咁投資環境同過去就完全唔一樣，而你的投資邏輯就要轉變，好似過去只要有錢就買股票就可以賺錢，因為過去低息周期，無論公司賺錢與否或者就算係一個概念股都可以炒得好高，傻瓜都能賺錢的時代已經過去。

有朋友就會問，假如重回高息環境，是不是就應該不要投資?老實講我都冇經歷過持續高息的環境，但而家網路發達，我哋可以從網路上找回過去歷史資料，鑑古知今為我哋未來投資帶來啟示。

而我最近在網上看到有朋友將過去高利率環境的股票升幅造成統計，結果同我對未來想法近似，藉此分享俾大家，統計中表示除咗利率高低帶動股價升跌之外, 在高利息環境之下另外兩個最重要影響股價的因素就是公司的收益以及股息分紅。簡單講就係你未來買股票要選擇賺錢能力高的公司，例如微軟淨利潤30%或者Tesla每年增長超過20%。假如他們可以保持這個勢頭都是一些非常好公司，這些都會反映價格之上，以及過去比股東分紅比較優秀的公司等。

放眼望去其實依啲公司不多, 又賺錢又願意分紅俾大家，其實本質上就是重回我哋過去一直講的巴菲特價值投資之上。那麼又有朋友會問現在我們去買微軟呢啲好公司就可以了嗎?因為它盈利高分紅又好，而事實上不一定，因為我們正處於依個交接點當中，依家好多好公司如果從一個價值投資者來講股價仍然偏高，因為好多投資者認為市場短期內將會重回過去一樣的低息環境，而願意用更多的溢價去買入呢啲股票，而新興市場包括中港股市現在更符合價值體現，當然中港股市有其自身問題，容我之後再講。

那麼什麼投資都不做了嗎?當然有危就有機，我哋可以同樣運用過去歷史睇一睇高息環境下有什麼資產價格表現相對比較好。

大家可以從圖表中看出上升最多的是價值股，第二就係細價股，第三REITs，商品，房地產，能源等，當然我認為唔會一模一樣咁重複，但亦都值得借鏡，而當中最受低估商品同能源將會是我哋重點觀察的投資之一，更深入內容下文再講。

投資大環境轉變(更新)