大家新年快樂

新一年投資組合都要一個新的主調，到目前為止大家都知道我相對比較保守為主。主要因為我認為美股仲未有牛市的條件，以投資組合當中始終環球佔比會比較多，因此仍然未放棄部份投資組合中現金為王的想法。

我可能大家會好奇怪，港股升到嘭嘭聲，美股sp500雖然係四千點窄幅上落，但某啲個股升得好好，特別係多人關注的Tesla都係低位反彈超過五成，因此市場偏好風險態度比較高，對市場比較正面。甚至好多人話已經從熊市變成牛市，今日我哋會主力討論一點到底美股牛市條件達成咗未？

而依三個條件分別係美聯儲貨幣政策，第二美國係已經宣佈係衰退之中？第三投資情緒？

先講第一個美聯儲的貨幣政策，呢個就必須要留意短期美國政府債券，特別係兩年期，因為多位所謂債王表示兩年期美國國債領先聯儲局行動。

確實如果單從兩年期美國國債去睇，最近表現已經走出上升軌道，亦都令到好多人幻想聯儲局將會減息重回過去非常寬鬆水平。但要留意嘅係，雖然佢跌穿左上升軌道，但係是否代表佢一定會回落？亦都係未知之數而且牛熊分界線200天線仲未跌穿，因此存有懷疑態度。

最近市場多次吹風美股已經從熊市到牛市其中一個主要原因就係聯儲局將會減息，大家睇到嚟緊呢一個月利率期貨仲係反映返嚟緊呢一個月仲會上升。因此仲未有明確減息嘅情況之下。一切都只能夠當佢係噪音。

去到第二美國是否處於衰退之中？

同過去大家對於經濟想法不同，通常衰退宣布之後美聯儲都會開始寬鬆貨幣政策，就好似前幾年疫情發生初期環球市場進入衰退，當其時就出現咗非常少見嘅大牛市，依點你唔需要睇任何數據，只要衰退正式宣佈，你就會好多報紙雜誌中睇到，到其時可以再考慮是否應該加重美股投資部份。

第三投資情緒

現在美股投資情緒絕對唔可以用悲觀嚟形容，大家留意幾個月前港股未開始爆升之前的情緒就會發覺轉勢都要處於極度悲觀當中，當其時好多人棄港股買美股，起碼而家我睇唔到呢個情況發生，現在仲有好多人持續進入美股市場。

其實我講咁多，只不過係想大家了解現時市場風險，而非完全阻止你去買入美股，但要了解市場而家發生緊咩事，你先可以部署適當百分比進入市場，而非一聽到市場或美股從熊市到牛市就all in買入，現在絕非這個時刻。下星期再講。

環球視野第四課